جہلم//نثار احمد مغل//دوست دوست نہ رہا پیار پیار نہ رہا،جہلم کے علاقے ڈھوک فردوس میں معمولی جھگڑے پر دوست نے ساتھیوں کے ساتھ مل کر دوست کی جان لے لی،جہلم کے علاقے ڈھوک فردوس میں معمولی جھگڑے پر دوست نے ساتھیوں کے ساتھ مل کر دوست کی جان لے لی۔ تفصیلات کے مطابق بتایا جاتا ہے کہ جہلم میں تھانہ سول لائن کے علاقے ڈھوک فردوس میں افسوسناک واقعہ پیش آیا، جہاں ایک دوست نے معمولی جھگڑے پر اپنے ہی دوست کو گولیوں سے چھلنی کر کے موت کے گھاٹ اتار دیا۔ مقتول عبداللہ اور ملزم ولید کے درمیان چند روز قبل کسی معمولی بات پر تلخ کلامی ہوئی تھی جو بعد ازاں جان لیوا دشمنی میں تبدیل ہوگئی۔ مقتول عبداللہ جیسے ہی گھر سے باہر نکلا تو گھات لگائے ملزم ولید نے اپنے ساتھیوں کے ہمراہ اس کا راستہ روک کر اندھا دھند فائرنگ کردی، جس کے نتیجے میں 19 سالہ نوجوان موقع پر ہی دم توڑ گیا جبکہ قاتل اور اس کے ساتھی موقع سے فرار ہونے میں کامیاب ہوگئے۔ واقعے کی اطلاع ملتے ہی پولیس اور کرائم سین یونٹ موقع پر پہنچے اور شواہد اکٹھے کرنے کا عمل شروع کر دیا۔ مقتول کی لاش کو پوسٹ مارٹم کے لیے ڈسٹرکٹ ہیڈکوارٹر اسپتال منتقل کر دیا گیا ہے۔ پولیس حکام کا کہنا ہے کہ ملزم ولید اور اس کے ساتھیوں کو جلد گرفتار کر لیا جائے گا۔ واقعے کا مقدمہ درج کر کے ملزمان کی گرفتاری کے لیے چھاپے مارے جا رہے ہیں۔
