بڑاگواہ اور گردونواح میں تھریشر مالکان کی من مانیاں عروج پر،فی گھنٹہ 7سے8ہزار وصولی جاریڈیزل کی قیمتوں میں نمایاں کمی کے باوجود تھریشر ریٹ کم نہ ہو سکے،انتظامیہ بھی خاموش،اسسٹنٹ کمشنر سوہاوہ سے کسانوں نے نوٹس لینے کا مطالبہ کردیا۔
سوہاوہ:(محمدنبیل حسن):حکومت کی جانب سے ڈیزل کی قیمتوں میں نمایاں کمی کے باوجود بڑاگواہ اور گردونواح کے علاقوں میں تھریشر مالکان نے ریٹس کم کرنے سے صاف انکار کر دیا ہے۔ کسانوں کی جانب سے شدید احتجاج کے باوجود تھریشر مالکان اپنی من مانیاں جاری رکھے ہوئے ہیں۔تفصیلات کے مطابق، علاقے میں تھریشر ریٹس کا کوئی ایک معیار مقرر نہیں ہے۔ کچھ مالکان 6 ہزار روپے فی گھنٹہ وصول کر رہے ہیں تو بعض جگہوں پر کسانوں سے 7ہزار سے8 ہزار روپے فی گھنٹہ تک بٹورا جا رہا ہے۔ ڈیزل سستا ہونے کا فائدہ کسانوں تک پہنچانے کے بجائے مشین مالکان اپنی جیبیں بھرنے میں مصروف ہیں۔مقامی کسانوں کا کہنا ہے پہلے ہی گندم کی فصل کے اخراجات پورے کرنا مشکل ہو رہا ہے، اوپر سے تھریشر مالکان کی لوٹ مار نے ہماری کمر توڑ دی ہے۔ ضلعی انتظامیہ اور اسسٹنٹ کمشنر سوہاوہ غزالہ اصغر کو اس صورتحال کا فوری نوٹس لینا چاہیے اور سرکاری ریٹ لسٹ نافذ کرنی چاہیے۔انتظامیہ کی اس سنگین معاملے پر خاموشی نے کسانوں میں مایوسی پیدا کر دی ہے۔ عوامی حلقوں نے مطالبہ کیا ہے کہ فی الفور تھریشر مالکان کے خلاف کارروائی کی جائے اور ڈیزل کی قیمتوں میں کمی کے تناسب سے کرایوں میں کمی کو یقینی بنایا جائے۔
