جہلم (نعیم احمد بھٹی) جہلم پولیس کی بڑی کاروائی مذہبی سکالر انجینئر محمد علی مرزا کی اکیڈمی پر حملہ کرنے والے دہشت گرد کو ہلاک کر دیا صبح تقریبا 10 بجکر کچھ منٹ پر ایک نامعلوم شخص نے غیر معمولی انداز اپناتے ہوئے سڑک کے دوسری جانب پوزیشن سنبھالی اور اچانک اکیڈمی کے مرکزی دروازے اور وہاں تعینات پولیس اہلکاروں پر اندھا دھند فائرنگ شروع کر دی۔ فائرنگ کے دوران ایک پولیس جوان نے بے مثال جرات کا مظاہرہ کرتے ہوئے حملہ آور کا ڈٹ کر مقابلہ کیا، تاہم وہ زخمی ہو گیا۔ اسے فوری طور پر قریبی ہسپتال منتقل کر دیا گیا جہاں اسے طبی امداد فراہم کی جا رہی ہے۔ واقعے کے فوراً بعد پولیس نے نہایت پیشہ ورانہ مہارت کا مظاہرہ کرتے ہوئے جوابی کارروائی کی۔ مقابلے کے بعد حملہ آور کو موقع پر ہی ہلاک کر دیا گیا، پولیس حکام کے مطابق ہلاک ہونے والے شخص کی تاحال شناخت نہیں ہو سکی کیونکہ اس کے پاس کوئی شناختی دستاویز موجود نہیں تھی۔ سیکیورٹی ادارے واقعے کے مختلف پہلوؤں پر تحقیقات جاری رکھے ہوئے ہیں تاکہ اس حملے کے پسِ پردہ محرکات اور ممکنہ سہولت کاروں کا سراغ لگایا جا سکے۔ شہر میں اس واقعے کے بعد سیکیورٹی مزید سخت کر دی گئی ہے جبکہ شہریوں میں تشویش کی لہر دوڑ گئی ہے۔
