پروفیسر خورشید علی ڈار کی رپورٹ کے مطابق
دینہ کے سینئر صحافیوں پروفیسر خورشید علی ڈار اور ظہیر عبّاس نے ایڈیشنل ڈپٹی کمشنر جہلم محترمہ شگفتہ جبین سے خصوصی ملاقات کی، جس میں تحصیل دینہ کے اہم عوامی مسائل پر تفصیلی تبادلہ خیال کیا گیا۔ملاقات کے دوران اے ڈی سی جی شگفتہ جبین نے کہا کہ “عوامی مسائل کا حل اور بہتر انتظامی نگرانی ہماری اولین ترجیح ہے، تمام محکمے عوامی سہولت کے لیے مربوط انداز میں کام کریں گے۔گفتگو میں ریٹ لسٹ پر عمل درآمد، پنجاب فوڈ اتھارٹی اور تحصیل انتظامیہ کے باہمی تعاون میں بہتری، سول ڈیفنس کے کردار کو فعال کرنے، ’’ستھرا پنجاب‘‘ پروگرام میں مزید بہتری اور تحصیل دینہ میں بڑھتے ٹریفک مسائل شامل تھے۔صحافیوں نے رورل ہیلتھ سینٹر دینہ میں انسولین کی کمی کے باعث مریضوں کو درپیش مشکلات کی نشاندہی کی، جس پر اے ڈی سی جی نے اس مسئلے کو فوری طور پر متعلقہ محکمے تک پہنچانے اور حل کرنے کی یقین دہانی کروائی۔ملاقات کے دوران کرایہ نامہ پر عمل درآمد اور دیگر شہری مسائل پر بھی مثبت تجاویز پیش کی گئیں۔ ایڈیشنل ڈپٹی کمشنر نے اسسٹنٹ کمشنر دینہ صفا عابد کی پیشہ ورانہ صلاحیتوں اور فیلڈ میں فعال کردار کو سراہتے ہوئے کہا کہ وہ تحصیل میں بہتری کے لیے قابلِ قدر خدمات سرانجام دے رہی ہیں۔آخر میں صحافی برادری نے انتظامیہ کے ساتھ تعاون جاری رکھنے کے عزم کا اظہار کیا، جبکہ اے ڈی سی جی نے عوامی مسائل کے حل کے لیے مشترکہ کوششوں پر زور دیا۔
