ہائر سیکنڈری سکول دینہ میں 69 گروپ کی جانب سے پوزیشن ہولڈرز کے اعزاز میں شاندار تقریب ،اسسٹنٹ کمشنر دینہ محترمہ صفا عابد مہمان خصوصی
دینہ(پروفیسر خورشید علی ڈار)تفصیلات کے مطابق گورنمنٹ ہائر سیکنڈری سکول دینہ میں 69 گروپ کے زیر اہتمام پوزیشن ہولڈرز طلبہ کے اعزاز میں شیلڈز اور نقد انعامات کی تقسیم کی ایک پروقار تقریب منعقد ہوئی۔تقریب میں تعلیمی، سماجی اور انتظامی شخصیات نے بڑی تعداد میں شرکت کی۔تقریب کی مہمانِ خصوصی اسسٹنٹ کمشنر دینہ محترمہ صفا عابد تھیں جنہوں نے نمایاں پوزیشن حاصل کرنے والے طلبہ میں انعامات تقسیم کیے۔پہلی، دوسری اور تیسری پوزیشن حاصل کرنے والے طلبہ کو بالترتیب 30 ہزار، 25 ہزار اور 20 ہزار روپے نقد انعامات کے ساتھ شیلڈز دی گئیں۔تلاوت اور نعت کا شرف حاصل کرنے والے دونوں طالب علموں کو پانچ پانچ ہزار روپے نقد انعام دیے گئے۔اس کے علاوہ مستحق طلبہ کی داخلہ فیس بھی ادا کرنے کا اعلان کیا گیا۔69 گروپ کی جانب سے تعلیم اور دیگر شعبہ جات میں بہترین کارکردگی پر ڈی ای او سیکنڈری محمد شہزاد، ڈی ای او ایلیمنٹری عطیہ حمید اور ڈی ایس پی ٹریفک خرم فیاض کو اسسٹنٹ کمشنر دینہ کے دستِ مبارک سے خصوصی شیلڈز پیش کی گئیں۔تقریب میں ڈپٹی ڈائریکٹر سوشل ویلفیئر خضر حیات خان، اسسٹنٹ ڈائریکٹر علیم یوسف اور فوکل پرسن ٹریفک پولیس عبدالغفور چوہان نے بھی خصوصی شرکت کی۔اس موقع پر اسسٹنٹ کمشنر دینہ اور دیگر مقررین نے ایڈووکیٹ فرحت کمال ضیا اور 69 گروپ کی تعلیمی خدمات کو سراہتے ہوئے انہیں شاندار الفاظ میں خراجِ تحسین پیش کیا۔مقررین کا کہنا تھا کہ اس طرح کی تقریبات طلبہ میں محنت، لگن اور مقابلے کے جذبے کو فروغ دیتی ہیں اور معاشرے میں تعلیم کی اہمیت اجاگر کرنے میں اہم کردار ادا کرتی ہیں
