کھیوڑہ ( راشد خان سے)پٹرولیم قیمتوں میں تاریخی اضافہ، عوام پر “پٹرول بم” کھیوڑہ و پنڈ دادنخان میں غم و غصہ عروج پر
پٹرول 458.40 اور ڈیزل 520.35 روپے، مہنگائی کے نئے طوفان کا خدشہ، ریلیف نہ ملا تو بڑی تبائی ہوگی تفصیلات کے مطابق پٹرولیم مصنوعات کی قیمتوں میں حالیہ ہوشربا اضافے نے کھیوڑہ اور پنڈ دادنخان سمیت ملک بھر میں عوامی بے چینی کو شدید غصے میں بدل دیا ہے، جہاں شہریوں نے اسے “پٹرول بم” قرار دیتے ہوئے کہا ہے کہ پٹرول 458.40 روپے اور ڈیزل 520.35 روپے فی لیٹر تک پہنچ جانا ملکی تاریخ کے بڑے اضافوں میں شامل ہے اور اس کے اثرات براہِ راست عام آدمی کی زندگی پر پڑیں گے، عوام کے مطابق یہ اضافہ غریب کو زندہ دفن کرنے کے مترادف ہے کیونکہ پہلے ہی مہنگائی، بے روزگاری اور کم آمدن نے لوگوں کا جینا مشکل بنا رکھا تھا اور اب ٹرانسپورٹیشن مہنگی ہونے سے اشیائے خوردونوش، کرایوں اور دیگر ضروریات کی قیمتوں میں مزید اضافہ ناگزیر ہو گیا ہے جس سے نہ صرف گھریلو بجٹ تباہ ہوگا بلکہ کاروباری سرگرمیاں بھی بری طرح متاثر ہوں گی، شہریوں اور تاجر برادری کا کہنا ہے کہ حکومت عالمی حالات کا بہانہ بنا کر اپنی معاشی بدانتظامی اور ناقص پالیسیوں کا بوجھ عوام پر ڈال رہی ہے جبکہ حکمران خود پروٹوکول اور شاہ خرچیوں میں کمی لانے کو تیار نہیں، عوام نے سوال اٹھایا کہ جب عالمی منڈی میں قیمتوں میں اتار چڑھاؤ آتا ہے تو اس کا پورا بوجھ صرف عوام پر کیوں منتقل کیا جاتا ہے، انہوں نے مطالبہ کیا کہ حکومت فوری طور پر پٹرولیم مصنوعات کی قیمتوں میں کمی کرے، تاجروں، ٹرانسپورٹرز اور عام شہریوں کے لیے خصوصی ریلیف پیکج کا اعلان کیا جائے اور عملی طور پر سادگی اپنائی جائے، بصورت دیگر ملک بھر کی تاجر برادری نے احتجاج کا حق محفوظ رکھنے کا اعلان کرتے ہوئے کہا ہے کہ اگر عوام کی آواز نہ سنی گئی تو حالات مزید خراب ہو سکتے ہیں کیونکہ موجودہ صورتحال میں عام آدمی کے لیے دو وقت کی روٹی کا حصول بھی ایک بڑا چیلنج بنتا جا رہا ہے۔
