چیف ایڈیٹر:طارق محمود چودھری  ایڈیٹر: مظہر اقبال چودھری  مینیجنگ ایڈیٹر: ادریس چودھری

فروری 19, 2025 7:49 شام

جہلم:جرمن ترقیاتی ادارے کی مالی معاونت سے قریب ساٹھ لاکھ روپے کا یہ سامان جلد سینیٹری ورکرز کے استعمال کے لئے میسر ہو گا،ڈی سی

جہلم(رانا محمد عاصم)سینیٹری ورکرز کی قیمتی جانوں کے تحفظ اور شہریوں کو بہترین بلدیاتی سہولیات کی فراہمی کے لئے جدید مشینری اور سامان مہیا کیا جا رہا ہے۔اس سامان میں خصوصی حفاظتی لباس، آکسیجن سلنڈر، وینٹلیشن سسٹم اور سیفٹی ہیلمٹس وغیرہ شامل ہیں۔ جرمن ترقیاتی ادارے کی مالی معاونت سے قریب ساٹھ لاکھ روپے کا یہ سامان جلد سینیٹری ورکرز کے استعمال کے لئے میسر ہو گا۔ان حفاظتی آلات کے استعمال سے نہ صرف سینیٹری ورکرز کی جانوں کا تحفظ ہو گا بلکہ وہ مختلف خطرناک جراثیم اور بیماریوں سے بھی بچ سکیں گے اور ان کی کارکردگی میں بھی اضافہ ہو گا۔ ان خیالات کا اظہار ڈپٹی کمشنر جہلم میثم عباس نے ان آلات کے استعمال پر منعقد کی گئی ٹریننگ کے شرکا سے خطاب کرتے ہوئے کیا۔جبکہ محمود مسعود تمنا جنرل منیجر آء ڈی پی ایم ڈی ایف سی نے شرکا سے خطاب کرتے ہوئے بتایا کہ آج کا یہ ایونٹ پنجاب میونسپل ڈویلپمنٹ فنڈ کمپنی اور جرمن ترقیاتی ادارے کی معاونت سے کروایا جا رہاہے۔ اس ٹریننگ کا اہتمام جرمن ترقیاتی ادارے کے پروگرام کے تحت کیا گیا جو کہ جہلم کے ساتھ ساتھ شیخوپورہ، ٹوبہ ٹیک سنگھ اور لاہور میں جاری ہے۔ٹریننگ ورکشاپ میں پچاس سے زائد مردو خواتین سینیٹری ورکرز کو سالڈ اور لیکوئڈ ویسٹ کے حوالے سے پیشہ ورانہ تحفظ اور صحت کے حوالے سے بھی آگاہی دی گئی۔ ماہرٹرینر ظہیر احمد نے شرکا کو اس موضوع پر ایک خصوصی کتابچہ بھی مہیا کیا جس میں اس حوالے سے تمام تفصیلات موجود ہیں اور سینیٹری ورکرز اور سپر وائزر ان رہنما اصولوں پر عمل کرتے ہوئے اپنی پیشہ ورانہ ذمہ داریاں محفوظ اور مزید بہتر انداز میں ادا کر سکتے ہیں۔ظفر اقبال نے ٹریننگ ورکشاپ میں شرکا کو مختلف آلات کے استعمال کے حوالے سے عملی تربیت بھی دی۔ شرکا کا کہنا تھا کہ اس ٹریننگ سے انہیں بہت فائدہ ہوا ہے اور اب وہ سیوریج میں موجود مضر صحت گیسوں اور خطرناک ویسٹ سے بچتے ہوئے مزید محفوظ انداز میں اپنے فرائض منصبی بہتر انداز میں سر انجام دے سکیں گے۔تقریب میں ایڈمنسٹریٹر ایم سی جہلم صبا سحر، پنجاب میونسپل ڈویلپمنٹ فنڈ کمپنی سے وہاب خالد، گلزار حسین،محمد قاسم پروگرام آفیسرز صہیب رفیق، ڈپٹی منیجر، مبشر احمد کمیونیکیشن ڈیپارٹمنٹ اور میونسپل کمیٹی جہلم کے دیگر افسران نے بھی شرکت کی۔تقریب کے اختتام پر شرکا کو سرٹیفکیٹ بھی دیئے گئے۔

Facebook
Twitter
LinkedIn
Pinterest
Pocket
WhatsApp

متعلقہ خبریں

تازہ ترین خبریں