*دینہ۔ راولپنڈی ویسٹ مینجمنٹ کمپنی کے “ستھرا پنجاب” پروگرام کے تحت پیر بھچر شریف میں بڑا صفائی آپریشن، اسسٹنٹ منیجر اویس ملک کی نگرانی میں گلیاں، نالیاں اور کوڑا پوائنٹس مکمل صاف، اہلِ علاقہ کارکردگی پر مطمئن
*دینہ(رپورٹ: سید ذوالقرنین شاہ) راولپنڈی ویسٹ مینجمنٹ کمپنی (RWMC) کے زیرِ انتظام “ستھرا پنجاب” پروگرام کے تحت یونین کونسل مدوکالس، تحصیل دینہ کے گاؤں پیر بھچر شریف میں جامع صفائی آپریشن مکمل کر لیا گیا۔ صفائی مہم راولپنڈی ویسٹ مینجمنٹ کمپنی کے اسسٹنٹ منیجر اویس ملک کی خصوصی نگرانی میں جاری رہی، جبکہ سپروائزر بہادر علی اور میٹ خرم نے اپنی ٹیم کے ہمراہ بھرپور محنت کرتے ہوئے گلی محلوں کو صاف ستھرا بنانے میں اہم کردار ادا کیا۔ تفصیلات کے مطابق حالیہ بارشوں کے باعث پیر بھچر شریف کی مین گلی، مسجد بلال والی گلی اور دیگر علاقوں میں کچرے اور گندگی کے ڈھیر جمع ہو گئے تھے، جبکہ نالیوں کی بندش کے باعث کوڑا کرکٹ گلیوں میں پھیل چکا تھا، جس سے اہلِ علاقہ کو شدید مشکلات کا سامنا تھا۔ ستھرا پنجاب ٹیم نے مرحلہ وار صفائی آپریشن شروع کرتے ہوئے گلیوں اور نالیوں کی مکمل صفائی کی اور بلاکیج ختم کر کے جمع شدہ کچرے کو فوری طور پر ٹھکانے لگایا۔ صفائی مہم کے دوران گاؤں کے مرکزی کوڑا پوائنٹ کو بھی ہیوی مشینری اور ٹریکٹر کی مدد سے مکمل صاف کیا گیا، جبکہ منی ڈمپرز کے ذریعے بڑی مقدار میں کچرا اٹھا کر مقررہ مقامات پر منتقل کیا گیا، جس کے بعد علاقے میں صفائی کی صورتحال نمایاں طور پر بہتر ہو گئی۔ گاؤں کے نمبردار طارق محمود شاہ نے راولپنڈی ویسٹ مینجمنٹ کمپنی اور ستھرا پنجاب ٹیم کی کارکردگی کو سراہتے ہوئے کہا کہ اسسٹنٹ منیجر اویس ملک کی بہترین نگرانی اور مؤثر حکمتِ عملی کے باعث صفائی کے کام میں واضح بہتری دیکھنے میں آئی ہے۔ انہوں نے سپروائزر بہادر علی، میٹ خرم اور تمام ورکرز کی محنت کو خراجِ تحسین پیش کرتے ہوئے کہا کہ ٹیم نے انتہائی جانفشانی اور ذمہ داری کے ساتھ فرائض سرانجام دیے، جس سے اہلِ علاقہ کو بڑا ریلیف ملا ہے۔ اہلِ علاقہ نے صفائی آپریشن پر اطمینان کا اظہار کرتے ہوئے مطالبہ کیا کہ راولپنڈی ویسٹ مینجمنٹ کمپنی کی جانب سے اسی طرح مستقل بنیادوں پر صفائی کے اقدامات جاری رکھے جائیں تاکہ گاؤں کو صاف ستھرا اور بیماریوں سے محفوظ رکھا جا سکے۔
