*تعلیمی بورڈ راولپنڈی میٹرک امتحانات میں شفافیت اور جدید نگرانی کے باعث پنجاب بھر میں نمایاں**کمشنر راولپنڈی انجینئر عامر خٹک کی متحرک قیادت، 416 امتحانی مراکز کی براہِ راست نگرانی، نقل مافیا کے خلاف مؤثر کارروائیاں*
جہلم(ظہیر عبّاس)تفصیلات کے مطابق وزیراعلیٰ پنجاب مریم نواز شریف کے ویژن کے مطابق میٹرک پہلا سالانہ امتحان 2026 میں شفافیت، میرٹ اور نظم و ضبط کو یقینی بنانے کے لیے تعلیمی بورڈ راولپنڈی نے جدید نگرانی کے نظام اور مؤثر انتظامی حکمت عملی کے تحت نمایاں کامیابی حاصل کر لی۔چیف سیکرٹری پنجاب زاہد اختر زمان اور صوبائی وزیر تعلیم رانا سکندر حیات کی خصوصی ہدایات پر مؤثر عملدرآمد کرتے ہوئے امتحانی نظام کو جدید تقاضوں سے ہم آہنگ بنایا گیا۔کمشنر راولپنڈی و چیئرمین تعلیمی بورڈ انجینئر عامر خٹک کی متحرک قیادت اور انتظامی بصیرت کے باعث امتحانات کامیابی سے جاری رہے۔تعلیمی بورڈ دفتر میں جدید مرکزی نگرانی و کنٹرول روم قائم کیا گیا جہاں سے 416 امتحانی مراکز کی براہِ راست نگرانی کی گئی۔ ضلع انتظامیہ، موبائل انسپکٹرز اور ضلعی نگرانی کمیٹیوں کی جانب سے مختلف امتحانی مراکز کے اچانک دورے بھی جاری رہے تاکہ شفاف امتحانی ماحول کو برقرار رکھا جا سکے۔بورڈ انتظامیہ نے نقل مافیا کے خلاف فیصلہ کن کارروائیاں کرتے ہوئے نقل کے رجحان کی مؤثر حوصلہ شکنی کی۔ مجموعی طور پر 99 نقل کے مقدمات درج کیے گئے جبکہ مؤثر اور جامع حکمت عملی کے باعث فرضی امیدوار کا کوئی بھی مقدمہ سامنے نہیں آیا۔ حساس امتحانی مراکز میں امیدواران کی بائیو میٹرک کے ذریعے حاضری کو یقینی بنایا گیا جبکہ حساس عملی امتحانی لیبارٹریوں کو بھی مرکزی نگرانی مرکز سے براہِ راست مانیٹر کیا جا رہا ہے۔تعلیمی بورڈ راولپنڈی کی جانب سے امیدواران کو پُرامن، شفاف اور سہل امتحانی ماحول فراہم کرنے کے اقدامات کو تعلیمی حلقوں میں بے حد سراہا جا رہا ہے۔
