دینہ( محمد الیاس کھوکھر ، ڈسٹرکٹ بیوروچیف جہلم )تحریک عشقِ رسول ﷺ کے مرکزی امیر غلام رسول نقشبندی نے اپنی مرکزی ٹیم کے ہمراہ پریس کلب دینہ کا دورہ کیا ، پریس کلب دینہ کی جانب سے جنرل سیکرٹری پریس کلب دینہ افتخار احمد مغل ، فنانس سیکرٹری سید جواد حسین شاہ ، ایگزیکٹو ممبران سید جہانگیر حسین شاہ ، ظہیر اختر بٹ اور محمد الیاس کھوکھر جبکہ دیگر پریس کلب ممبران جن میں سید امیر حسین شاہ ، رب نواز گوندل ، ماجد خان آفریدی اور یاسر صدیق نے مرکزی ٹیم کا استقبال کیا اور انھیں پھولوں کے ہار پہنائے ، جہاں انہوں نے مختلف مذہبی و تنظیمی شخصیات سے ملاقاتیں کیں اور ماہِ ربیع الاول شریف کے استقبال کے سلسلے میں منعقد ہونے والی محافل و تقریبات کے انتظامات کا جائزہ لیا۔اس موقع پر غلام رسول نقشبندی نے گفتگو کرتے ہوئے کہا کہ ماہِ ربیع الاول مسلمانوں کے لیے محبتِ رسول ﷺ کے اظہار، درود و سلام کی کثرت اور سیرتِ طیبہ پر عمل کا مہینہ ہے۔ انہوں نے عاشقانِ رسول سے اپیل کی کہ وہ ربیع الاول شریف کے استقبال کو بھرپور مذہبی جوش و جذبے کے ساتھ منائیں اور اپنی نسلوں میں عشقِ مصطفیٰ ﷺ کو فروغ دیں۔انہوں نے تحریکِ عشقِ رسول ﷺ کا خصوصی پیغام دیتے ہوئے اعلان کیا کہ 29 صفر المظفر کی رات 9 بجے دنیا بھر کے مسلمان جہاں بھی ہوں، اپنے پیارے آقا حضرت محمد مصطفیٰ ﷺ کی بارگاہِ اقدس میں دو منٹ تک ہدیۂ درودِ پاک پیش کریں اور ماہِ میلادِ مصطفیٰ ﷺ کا روح پرور انداز میں استقبال کریں۔انہوں نے کہا کہ یہ عالمی روحانی مہم امتِ مسلمہ کو محبت، اتحاد اور حضور نبی کریم ﷺ سے والہانہ وابستگی کے رشتے میں مزید مضبوط بنانے کا ذریعہ ثابت ہوگی ۔
