جہلم( ادریس چودھری) رسولِ اکرم ﷺ کی ذاتِ مبارکہ اور حیاتِ طیبہ ہر شعبہ زندگی سے تعلق رکھنے والے افراد کے لیے کامل نمونہ ہے۔ آپ ﷺ کی سیرت ذاتی کردار، خاندانی تعلقات، پیشہ ورانہ ذمہ داریوں اور معاشرتی معاملات میں رہنمائی فراہم کرتی ہے۔ انہوں نے اس امر پر زور دیا کہ قرآنِ کریم کے پیغام کو سمجھنے کے ساتھ یہ جاننا بھی ضروری ہے کہ نبی کریم ﷺ نے اللہ تعالیٰ کی ہدایات کو اپنی زندگی میں کس طرح عملی صورت دی۔ انہوں نے شرکاء کو قرآن و سیرت سے اپنا تعلق مضبوط بنانے اور ان تعلیمات کو روزمرہ زندگی میں اپنانے کی تلقین کی۔امیر عبدالقدیر اعوان شیخ سلسلہ نقشبندیہ اویسیہ کا شکاگو میں قونصل خانہ پاکستان اور سبیل سینٹر کے اشتراک سے سیرتِ طیبہ ﷺ کانفرنس سے خطاب۔ شکاگو میں پاکستان کے قونصل خانے اور سبیل سینٹر کے اشتراک سے سیرتِ طیبہ ﷺ کانفرنس منعقد ہوئی، جس میں علمائے کرام، اہلِ علم اور پاکستانی امریکن کمیونٹی کے ارکان نے کثیر تعداد میں شرکت کی۔ سلسلہ نقشبندیہ اویسیہ کے شیخ امیر عبدالقدیر اعوان اس پروقار تقریب کے مہمانِ خصوصی تھے۔ پروفیسر مارشیا ہینسن اور پروفیسر انعام الحق نے بھی کلیدی خطابات کیے۔پروفیسر مارشیا ہینسن اور پروفیسر انعام الحق نے اپنے خطابات میں حیاتِ نبوی ﷺ کے مختلف پہلوؤں پر روشنی ڈالی اور آپ ﷺ کی تعلیمات کی ہمہ گیر اہمیت کو اجاگر کیا۔آئیفانکا اور سبیل سینٹر کے سربراہ ڈاکٹر منیر چوہدری نے اپنے مختصر کلمات میں حلال سرٹیفکیشن کے کام کی اہمیت بیان کی اور اسے اپنے ادارے کے بنیادی مشن کا محور قرار دیا۔قونصل جنرل زمان مہدی نے معزز مقررین کا خیرمقدم کیا اور اس اہم کانفرنس کے مشترکہ انعقاد میں سبیل سینٹر کے تعاون کو سراہا۔ یاد رہے کہ حضرت امیر عبدالقدیر اعوان شیخ سلسلہ نقشبندیہ اویسیہ کینیڈا اور امریکہ کے روحانی تربیتی دورہ پر ہیں جہاں مختلف شہروں میں پروگرامز کا انعقاد کیا گیا جن میں آپ قلبی سکون اور سیرت پاکﷺ کے حوالے سے لیکچرز دے رہے ہیں۔
