قرآنِ کریم: ہدایت اور کامیابی کا سرچشمہ۔امیر عبدالقدیر اعوان شیخ سلسلہ عالیہ کاامریکہ، میری لینڈ میں پاکستانی کمیونٹی سے خصوصی خطاب میری لینڈ، امریکہ: معروف مذہبی و روحانی رہنما امیر عبدالقدیر اعوان نے میری لینڈ میں پاکستانی کمیونٹی کے ایک اجتماع سے خطاب کرتے ہوئے قرآنِ کریم کی عظمت، اس کی آفاقی تعلیمات اور انسانی زندگی پر اس کے اثرات کو اجاگر کیا۔ انہوں نے کہا کہ قرآنِ کریم اللہ تعالیٰ کا کلام اور انسانیت کے لیے ہدایت و بشارت کا سرچشمہ ہے۔ اس کی رہنمائی دنیا اور آخرت دونوں کی کامیابی کے لیے کافی ہے۔ انہوں نے توجہ دلائی کہ قرآنِ کریم سے حقیقی استفادے کے لیے ضروری ہے کہ انسان محض تلاوت تک محدود نہ رہے بلکہ اس کے پیغام کو سمجھے اور اپنی زندگی میں اس پر عمل کرنے کی کوشش کرے۔امیر عبدالقدیر اعوان نے اللہ تعالیٰ کے کلام کی عظمت بیان کرتے ہوئے کہا کہ کلام کا اثر اس کے متکلم کی عظمت کے مطابق ہوتا ہے۔ جب عام انسان کے الفاظ بھی دوسروں کے دل و دماغ پر اثر انداز ہوتے ہیں تو خالقِ کائنات کے کلام کی عظمت اور اس کے اثرات کا اندازہ انسانی فہم سے باہر ہے۔ قرآنِ کریم انسان کو اپنے خالق سے تعلق، اپنی حقیقت اور زندگی کے مقصد کا شعور عطا کرتا ہے۔ انہوں نے عبادات کی حقیقی روح پر روشنی ڈالتے ہوئے کہا کہ نماز اور سجدہ محض ظاہری اعمال نہیں بلکہ بندے کے اپنے رب کے سامنے عاجزی، اطاعت اور بندگی کے اظہار کا ذریعہ ہیں۔ اسی طرح زکوٰۃ محض مالی ادائیگی نہیں بلکہ ایک ایسا نظام ہے جو معاشرے میں ضرورت مندوں کی مدد، وسائل کی گردش اور معاشی توازن کا سبب بنتا ہے۔ اسلامی احکامات کی پابندی ان کے حقیقی تقاضوں اور روح کے ساتھ ہونی چاہیے۔خطاب میں آخرت کی جواب دہی، انسانی اعمال اور رشتوں کے تقدس پر بھی خصوصی توجہ دلائی گئی۔ انہوں نے کہا کہ آخرت کا یقین انسان کو اپنے کردار، معاملات اور ذمہ داریوں کا احساس دلاتا ہے۔ والدین، اولاد اور دیگر رشتوں کے حقوق ادا کرنا بھی دینی ذمہ داریوں کا حصہ ہے۔ انسان کو دوسروں کے محاسبے سے پہلے اپنا محاسبہ کرنا چاہیے اور یہ دیکھنا چاہیے کہ اس کی زندگی اللہ تعالیٰ کے احکامات کے مطابق کس حد تک ہے۔امیر عبدالقدیر اعوان نے ذکرِ الٰہی، نیک اعمال اور سیرتِ رسول ﷺ کی پیروی کی اہمیت بیان کرتے ہوئے کہا کہ قرآنِ کریم کی تعلیمات کا اصل تقاضا یہ ہے کہ وہ انسان کے کردار، گھر، خاندان اور معاشرتی معاملات میں نمایاں ہوں۔ انہوں نے بالخصوص والدین کو اپنی اولاد کی دینی و اخلاقی تربیت پر توجہ دینے کی تلقین کی تاکہ آنے والی نسلیں دین سے مضبوط تعلق قائم رکھ سکیں۔اختتام پر امتِ مسلمہ اور حاضرین کے لیے دعا کی گئی کہ اللہ تعالیٰ سب کو قرآنِ کریم سمجھنے، اس پر عمل کرنے اور اپنی زندگیوں کو اس کی تعلیمات کے مطابق ڈھالنے کی توفیق عطا فرمائے۔ آمین۔
