*گورنمنٹ گرلز ایلیمنٹری اسکول کھوکھا دینہ میں ایسٹیم ماڈل نمائش ، ڈی ای او ایلیمنٹری زنانہ عطیہ حمید کی خصوصی شرکت*
جہلم(ظہیر عبّاس)تفصیلات کے مطابق گورنمنٹ گرلز ایلیمنٹری اسکول کھوکھا دینہ میں ایسٹیم(STEAM) ماڈل نمائش کا شاندار انعقاد کیا گیا، جس میں مختلف کلاسز کی طالبات نے اپنے سائنسی، فنی اور تخلیقی ماڈلز پیش کیے۔ننھی طالبات کے خیالات، مشاہدے اور مہارت نے شرکاء کو بے حد متاثر کیا۔نمائش میں ڈی ای او ایلیمنٹری زنانہ محترمہ عطیہ حمید اور ڈپٹی ڈی ای او دینہ محترمہ نبیلہ نے خصوصی شرکت کی۔معزز مہمانوں نے طالبات کے ماڈلز کا تفصیلی جائزہ لینے کے بعد ان کی کاوشوں کو سراہا اور کہا کہ ایسٹیم سرگرمیاں طالبات میں سائنسی شعور، اعتماد اور عملی علم کو پروان چڑھاتی ہیں۔ہیڈ مسٹرس اور اسکول اسٹاف کی بہترین انتظامی کارکردگی، رہنمائی اور محنت کو بھی خراجِ تحسین پیش کیا گیا۔طالبات کے چہروں پر اعتماد، ہاتھوں میں ہنر اور سوچ میں جدّت نے ثابت کیا کہ اگر بچوں کو مواقع اور حوصلہ دیا جائے تو وہ اپنی کامیابیوں کے نئے باب رقم کرنے کی صلاحیت رکھتی ہیں۔گورنمنٹ گرلز ایلیمنٹری اسکول کھوکھا دینہ کی یہ نمائش مستقبل کے روشن پاکستان کی امید ہے۔
