جہلم (نعیم احمد بھٹی) منشیات کا زہر گلیوں اور محلوں میں سرایت کرتا ہوا نوجوان نسل خطرے کی لکیر پر ہر گلی محلہ منشیات کے اندھے طوفان کی زد میں ہے نوجوان نسل آئس اور کرسٹل کے نشے میں مست نظر آتی ہے شہریوں نے ڈسٹرکٹ پولیس آفیسر طارق سندھو سے مطالبہ کیا ہے کہ گلی محلوں میں منشیات کی بڑھتی ہوئی لعنت کو ختم کیا جائے اور منشیات فروشوں کے خلاف سخت ایکشن لیا جائے تفصیلات کے مطابق شہر بھر کی گلیوں اور محلوں میں چرس، ہیروئن، آئس اور کرسٹل کا استعمال بڑھنے لگا یہ زہر اتنی تیزی سے پھیل رہا ہے کہ ہر دوسری گلی میں نشے کا شکار نوجوان دکھائی دیتا ہے اور معاشرہ بے بسی کے ساتھ یہ منظر دیکھنے پر مجبور ہے ذرائع کے مطابق پولیس کچھ منشیات فروشوں کو تو پکڑتی ہے لیکن بڑے بڑے منشیات فروش آج بھی پولیس کی پکڑ سے آزاد ہیں اور وہ دیدہ دلیری سے منشیات فروخت کر کے نوجوان نسل کو تباہی کے دھانے پر لے آئے ہیں شہریوں کا کہنا ہے کہ شہر بھر میں منشیات کا رجحان گزشتہ چند برسوں میں تشویشناک حد تک بڑھ چکا ہے۔ خاص طور پر آئس اور انجیکشن ڈرگز کے استعمال میں اضافہ نہ صرف صحت کے لیے خطرناک ہے بلکہ خاندانوں کو اندر سے بھی توڑ رہا ہے۔نشے کی لت میں مبتلا نوجوان تعلیم، روزگار اور مستقبل سے دور ہوتے جا رہے ہیں، جبکہ منشیات فروش منظم نیٹ ورکس کی شکل میں علاقہ بھر میں سرگرم ہیں شہریوں نے مزید کہا کہ پولیس کی جانب سے کارروائیوں کے دعوے تو کیے جاتے ہیں لیکن زمین پر صورتحال اس کے برعکس نظر آتی ہے۔ منشیات کا کھلا کاروبار اس بات کا ثبوت ہے کہ یہ مسئلہ صرف قانون نافذ کرنے والے اداروں کی غفلت نہیں، بلکہ ایک گہرے مافیا کا بھی حصہ ہے جو خوف، دباؤ اور بدعنوانی کے سائے میں پل رہا ہے کہیں ایسا نہ ہو کہ گلی اور محلوں کے نوجوان اندھیروں میں گم ہو جائیں اور آنے والی نسلوں کے ہاتھ صرف تباہی کی کہانی آئے شہریوں نے ڈسٹرکٹ پولیس آفیسر طارق سندھو سے نوٹس لینے کا مطالبہ کیا ہے
