ایس ای ائیسکو جہلم کی ٹیلیفونک کھلی کچہری، صارفین بجلی کی شکایات براہِ راست سنیں، بروقت رہنمائی فراہم کی گئی


جہلم(رپورٹ: پروفیسر خورشید ڈار) سی ای او ائیسکو اسلام آباد کی ہدایات پر 18 نومبر کو خالد اقبال خٹک، سپرنٹنڈنٹ انجینئر (ایس ای) ائیسکو جہلم نے ٹیلیفونک کھلی کچہری کے دوران صارفین بجلی کے مسائل اور شکایات براہِ راست سنیں۔ کھلی کچہری کا وقت صبح 10 بجے سے دوپہر 12 بجے تک مقرر تھا۔ مصدقہ ذرائع کے مطابق اس دوران موصول ہونے والی ہر کال سنی گئی اور شکایت کنندگان کو بروقت رہنمائی فراہم کی گئی۔ذرائع کے مطابق بعض صارفین کی شکایات ایسی بھی تھیں جن کا تعلق ایس ای ائیسکو جہلم کے دائرہ اختیار سے نہیں تھا بلکہ وہ منسٹری آف پاور سے متعلق تھیں۔ دوسری جانب ایس ای ائیسکو جہلم نے تمام ایس ڈی اوز کو پہلے ہی پابند کر رکھا ہے کہ وہ اپنے علاقوں میں بجلی صارفین کے مسائل اور شکایات کو ترجیحی بنیادوں پر حل کرتے ہوئے انہیں بروقت ریلیف فراہم کریں، جس کے باعث بیشتر مقامی نوعیت کے مسائل مقامی سطح پر ہی حل ہو جاتے ہیں۔



















