کھیوڑہ( راشد خان سے)کھیوڑہ میں تیز رفتاری کا المناک انجام، تیز رفتار موٹر سائیکل رکشے سے ٹکرا گیا زاہد نامی نوجوان زندگی کی بازی ہار گیاگورنمنٹ ہائی اسکول کے سامنے موٹر سائیکل اور رکشہ میں خوفناک تصادم، محلہ سلطانیہ میں صفِ ماتم تفصیلات کے مطابق کھیوڑہ میں گورنمنٹ ہائی اسکول کے سامنے پیش آنے والے دلخراش ٹریفک حادثے نے پورے شہر کو سوگوار کر دیا۔ تیز رفتاری اور لمحاتی لاپرواہی کے باعث موٹر سائیکل اور رکشہ آمنے سامنے ٹکرا گئے، جس کے نتیجے میں موٹر سائیکل سوار نوجوان زاہد ولد محمد افسر، سکنہ محلہ سلطانیہ، موقع پر ہی جاں بحق ہو گیا۔ حادثے کے فوراً بعد اہلِ علاقہ کی بڑی تعداد موقع پر جمع ہو گئی جبکہ ریسکیو اہلکاروں نے نعش کو تحویل میں لے کر قانونی کارروائی مکمل کی۔مرحوم زاید اپنے والدین کا واحد سہارا، بہن بھائیوں کی امید اور اہلِ خانہ کی خوشیوں کا مرکز تھا۔ اس کی ناگہانی موت سے محلہ سلطانیہ سمیت پورا کھیوڑہ غم کی لپیٹ میں آ گیا ہے۔ شہریوں نے حادثے پر گہرے دکھ اور افسوس کا اظہار کرتے ہوئے مطالبہ کیا ہے کہ تعلیمی اداروں کے سامنے ٹریفک قوانین پر سختی سے عمل درآمد کرایا جائے اور رفتار کو کنٹرول کرنے کے لیے مؤثر اقدامات کیے جائیں، تاکہ آئندہ قیمتی انسانی جانیں محفوظ رہ سکیں۔
