*الطاف حسین ہائی سکول جہلم میں مستحق طلبہ و طالبات میں نئے شوز تقسیم ، مہمانِ خصوصی سی ای او ایجوکیشن ڈاکٹر نازیہ شہزادی*
جہلم(پروفیسر خورشید علی)تفصیلات کے مطابق گورنمنٹ الطاف حسین ہائی سکول جہلم میں مستحق طلبہ و طالبات میں نئے شوز کی تقسیم کی تقریب منعقد ہوئی۔ تقریب کی مہمانِ خصوصی سی ای او ایجوکیشن ضلع جہلم ڈاکٹر نازیہ شہزادی تھیں۔ڈی ای او ایلیمنٹری عطیہ حمید نے مختلف سکولز کے مستحق طلبہ و طالبات کی نشاندہی میں اہم کردار ادا کیا۔تقریب میں مخیر حضرات کی جانب سے تعاون کو سراہا گیا جن میں پروفیسر خورشید علی(سینئر جرنلسٹ)، ریٹائرڈ ڈی ای او ایلیمنٹری عبدالحفیظ، ڈسٹرکٹ نیوز رپورٹر ظہیر عباس اور اے ای او امون مرزا شامل ہیں۔منتظمین کی جانب سے طلبہ و طالبات کی عزتِ نفس کو مدنظر رکھتے ہوئے فوٹو سیشن نہیں کیا گیا۔سی ای او ایجوکیشن ڈاکٹر نازیہ شہزادی نے تقریب سے خطاب کرتے ہوئے کہا کہ حکومتِ پنجاب اور محکمہ سکول ایجوکیشن مستحق اور نادار طلبہ کی فلاح و بہبود کے لیے بھرپور اقدامات کر رہے ہیں۔ انہوں نے کہا کہ ایسے اقدامات سے نہ صرف طلبہ کی تعلیمی ضروریات پوری ہوتی ہیں بلکہ ان کا اعتماد بھی بحال ہوتا ہے۔ ڈاکٹر نازیہ شہزادی نے مخیر حضرات کے تعاون کو قابلِ تحسین قرار دیتے ہوئے امید ظاہر کی کہ آئندہ بھی اسی جذبے کے تحت تعلیم دوست سرگرمیاں جاری رہیں گی۔
