پروفیسر خورشید علی ڈار کی رپورٹ کے مطابق: ڈپٹی کمشنر جہلم کی خصوصی ہدایت پر اسسٹنٹ کمشنر دینہ صفا عابد نے دینہ بائی پاس پر بڑی کارروائی کرتے ہوئے 3 کباڑ خانے سیل کر دیے۔ یہ کارروائی جی ٹی روڈ اور مین بائی پاس پر کوڑا کرکٹ اور کباڑ پھینکنے کے خلاف کی گئی ہے، جس کی وجہ سے نہ صرف شہر کی خوبصورتی متاثر ہو رہی تھی بلکہ ٹریفک کی روانی میں بھی مشکلات پیش آ رہی تھیں۔اسسٹنٹ کمشنر نے موقع پر معائنہ کے دوران پایا کہ کباڑ خانے کے مالکان مین روڈ پر سامان پھیلا کر تجاوزات اور گندگی کا سبب بن رہے تھے۔ انہوں نے واضح کیا کہ مین شاہراہوں پر گندگی پھیلانے اور تجاوزات قائم کرنے والوں کے خلاف زیرو ٹالرنس پالیسی اپنائی جا رہی ہے۔انتظامیہ کا کہنا ہے کہ شہر کو صاف ستھرا رکھنے اور شاہراہوں پر ٹریفک کی روانی برقرار رکھنے کے لیے ایسی کارروائیاں آئندہ بھی جاری رہیں گی۔ تمام مالکان کو تنبیہ کی گئی ہے کہ وہ اپنا کباڑ مقررہ حدود کے اندر رکھیں اور صفائی ستھرائی کے ضوابط کی مکمل پابندی کریں
