ایم پی اے سید رفعت محمود زیدی کا دینہ کا دورہ، گلی محلوں میں گندگی کے ڈھیر ، تحصیل انتظامیہ پر سخت ناراضگی کا اظہار
جہلم(ظہیر عبّاس)تفصیلات کے مطابق ایم پی اے پی پی 24 سید رفعت محمود زیدی صوبائی اسمبلی روانگی سے قبل تحصیل دینہ کے دورے پر آئے، جہاں انہوں نے شہر کے مختلف علاقوں کا معائنہ کیا۔اس دوران گلی محلوں میں صفائی ستھرائی کے ناقص انتظامات پر انہوں نے دینہ انتظامیہ پر سخت ناراضگی کا اظہار کیا۔ایم پی اے سید رفعت محمود زیدی نے گفتگو کرتے ہوئے کہا کہ بدقسمتی سے صفائی ستھرائی کا نظام صرف جی ٹی روڈ تک محدود ہو کر رہ گیا ہے۔جبکہ اندرونِ شہر اور رہائشی علاقوں کو مکمل طور پر نظرانداز کیا جا رہا ہے۔اقبال ٹاؤن محلہ چشتیاں کے مکینوں نے بھی ناقص صفائی کے مناظر دکھاتے ہوئے ایم پی اے سے مطالبہ کیا کہ اس سنگین مسئلے کو پنجاب اسمبلی میں بھرپور انداز میں اٹھایا جائے۔دورے کے دوران تحصیل دینہ کے مختلف وارڈز کے عوام نے ایم پی اے سید رفعت محمود زیدی سے براہِ راست رابطہ کیا اور اپنے مسائل و شکایات سے آگاہ کیا۔اس موقع پر انہوں نے عوام کو یقین دہانی کروائی کہ پنجاب اسمبلی کے اجلاس میں ان تمام مسائل پر مؤثر آواز بلند کی جائے گی اور عوامی حقوق کے تحفظ کے لیے ہر ممکن کردار ادا کیا جائے گا۔
