*سینیئر صحافیوں کی ایڈیشنل ڈپٹی کمشنر ریونیو سے ملاقات، عوامی مسائل پر تفصیلی گفتگو*
جہلم(پروفیسر خورشید ڈار)تفصیلات کے مطابق سینیئر صحافی پروفیسر خورشید علی ڈار اور ظہیر عباس نے ایڈیشنل ڈپٹی کمشنر ریونیو سنیہ صافی سے ملاقات کی، جس میں ضلع جہلم میں انتظامی امور اور عوامی مسائل پر تفصیلی تبادلۂ خیال کیا گیا۔ملاقات کے دوران ایڈیشنل ڈپٹی کمشنر ریونیو سنیہ صافی نے بتایا کہ وزیراعلیٰ پنجاب اور ڈپٹی کمشنر جہلم کی ہدایات کی روشنی میں ہائی رائز بلڈنگ مالکان کے ساتھ اجلاس منعقد کیا گیا ہے، جس میں انہیں حفاظتی اقدامات مکمل کرنے کے لیے 15 دن کی مہلت دی گئی ہے۔ مقررہ مدت میں احکامات پر عمل نہ کرنے کی صورت میں قانونی کارروائی عمل میں لائی جائے گی۔اس موقع پر تحصیل دینہ کے مسائل بھی زیر بحث آئے، خصوصاً حلقہ ٹھیکریاں جسے کمپیوٹرائزڈ کیا جا چکا ہے مگر اس کے باوجود متعدد کھیوٹ بلاک ہونے کی شکایات سامنے آئیں۔اس حوالے سے اسباب اور ممکنہ حل پر گفتگو کی گئی۔ایڈیشنل ڈپٹی کمشنر ریونیو نے کہا کہ متاثرہ افراد براہِ راست ان کے دفتر سے رجوع کریں تا کہ مسائل کا فوری ازالہ کیا جا سکے۔انہوں نے مزید کہا کہ اسسٹنٹ کمشنرز اور تحصیل داروں کو جلد کھلی کچہریوں کے انعقاد کی ہدایات دی جائیں گی تاکہ عام آدمی کو ریونیو معاملات میں سہولت اور ریلیف مل سکے۔ اس کے ساتھ ساتھ انہوں نے شہریوں پر زور دیا کہ وہ ٹیکس ادائیگی کے حوالے سے باشعور رویہ اپنائیں، کیونکہ ٹیکس کی بروقت ادائیگی سے عوامی فلاح و بہبود کے منصوبوں کو تقویت ملتی ہے۔
