*مشیر صحت پنجاب میجر جنرل (ر) اظہر محمود کیانی نے جہلم میں پولیو مہم کا افتتاح کر دیا، 2 لاکھ 29 ہزار بچوں کو قطرے پلانے کا ہدف*
جہلم( پروفیسر خورشید ڈار)تفصیلات کے مطابق مشیر وزیر اعلیٰ پنجاب برائے صحت میجر جنرل (ر) اظہر محمود کیانی نے ڈپٹی کمشنر جہلم اور سی ای او ہیلتھ کے ہمراہ ڈسٹرکٹ ہیڈ کوارٹر ہسپتال جہلم میں پولیو مہم کا باقاعدہ افتتاح کر دیا۔اس موقع پر انہوں نے کہا کہ ضلع بھر میں 1100 ٹیمیں تشکیل دی گئی ہیں جو 2 لاکھ 29 ہزار بچوں کو پولیو کے قطرے پلائیں گی۔انہوں نے بتایا کہ یہ انسداد پولیو مہم 2 سے 5 فروری تک 4 روز جاری رہے گی، جس کے دوران سرکاری ہسپتالوں، پبلک مقامات، شاپنگ مالز اور دیگر مصروف علاقوں میں بھی خصوصی ٹیمیں تعینات کی گئی ہیں۔اس کے علاوہ گھر گھر جا کر بچوں تک رسائی کو بھی یقینی بنایا جائے گا تاکہ کوئی بھی بچہ پولیو کے قطروں سے محروم نہ رہے۔مشیر صحت نے والدین سے اپیل کی کہ وہ قومی فریضہ سمجھتے ہوئے پولیو ٹیموں سے تعاون کریں اور اپنے بچوں کو قطرے ضرور پلوائیں۔انہوں نے ڈپٹی کمشنر جہلم میر رضا اوزگن، سی ای او ہیلتھ میاں مظہر حیات اور ان کی ٹیم کو خراج تحسین پیش کرتے ہوئے کہا کہ جہلم کو پولیو فری بنانے میں ضلعی انتظامیہ اور محکمہ صحت کی مسلسل محنت اور مؤثر حکمت عملی نمایاں کردار ادا کر رہی ہے۔اس موقع پر ایم ایس ڈی ایچ کیو ہسپتال ڈاکٹر زاہد تنویرمیڈکل ، ڈاکٹر جواد ڈار ڈسٹرکٹ ہیلتھ آفیسر جہلم ،ڈاکٹر مسعود منور سرویلنس آفیسر عالمی ادارہ صحت اور محکمہ کے دیگر افسران بھی موجود تھے۔
