جہلم:مزید گرین الیکٹرو بسز فراہم کی جائیں یا مسافروں کا کرایہ مقرر کیا جائے ، رش کے باعث سوار ہونے اور اُترنے میں انتہائی پریشانی ہوتی ہے ، چوری کی وارداتیں بھی بڑھ چکی ہیں ، ورکنگ ویمنز کی مریم نواز سے اپیل ،
جہلم ( سروے رپورٹ : محمد الیاس کھوکھر) مزید گرین الیکٹرو بسز فراہم کی جائیں یا مسافروں کا کرایہ مقرر کیا جائے ، رش کے باعث سوار ہونے اور اُترنے میں انتہائی پریشانی ہوتی ہے ، چوری کی وارداتیں بھی بڑھ چکی ہیں ، ورکنگ ویمنز کی مریم نواز سے اپیل ، تفصیلات کے مطابق ضلع جہلم کے سکولز ، کالجز ہسپتالوں اور مختلف دفاتر میں کام کرنے والی خواتین نے ایک سروے کے دوران بتایا کہ پاکستان میں ورکنگ ویمنز کو دوہری ذمہ داریوں یعنی گھر اور دفتر کے ساتھ کام کرنے کے لیے سنگین چیلنجز کا سامنا ہے ۔ بلا شبہ گرین الیکٹرک بسز کا منصوبہ غریب اور متوسط طبقے خصوصاً ورکنگ ویمنز کے لئے کسی نعمت سے کم نہیں لیکن جب سے ان بسز میں مفت سفری سہولت ملی ہے مرد مسافروں کا رش بہت زیادہ بڑھ گیا ہے ۔ مفت سفر کرنے کے شوقین حضرات سارا سارا دن ان بسز میں گھومتے رہتے ہیں جس کی وجہ سے ہمیں بس میں سوار ہوتے اور اترتے وقت بے ہنگم دھکم پیل کا سامنا رہتا ہے ۔ بعض وقت مرد حضرات بد تمیزی بھی کر جاتے ہیں جس سے ہمیں سخت ذہنی کوفت ہوتی ہے ۔ رش کے باعث اب تک چوری کی درجنوں وارداتیں ہو چکی ہیں ۔ ورکنگ ویمنز نے میڈیا کے توسط سے وزیر اعلیٰ پنجاب مریم نواز سے اپیل کی ہے کہ جہلم میں مزید گرین الیکٹرو بسز فراہم کی جائیں یا جلد از جلد ان بسز میں مسافروں کا کرایہ مقرر کیا جائے تاکہ صرف اور صرف ضرورت مند ہی سفر کر سکیں اور سیر سپاٹا کے شوقین بس میں سفر کرنے سے اجتناب برتیں ۔ کرایہ مقرر ہونے سے خواتین کو ان بسز میں سفر کرنے میں آسانی ہو گی ۔
