دینہ:شدید گرمی میں دینہ بجلی بحران کی لپیٹ میں، متعدد ٹرانسفارمر جواب دے گئے، شہری سراپا احتجاج، ایس ڈی او واپڈا سٹی دینہ اور لائن سپرٹنڈنٹ کو ڈس مس کرنے کا مطالبہ
دینہ(اسہیل انجم قریشی سے ) شدید گرمی میں دینہ بجلی بحران کی لپیٹ میں، متعدد ٹرانسفارمر جواب دے گئے، شہری سراپا احتجاج، ایس ڈی او واپڈا سٹی دینہ اور لائن سپرٹنڈنٹ کو ڈس مس کرنے کا مطالبہ۔تفصیلات کے مطابق دینہ میں شدید گرمی کے دوران بجلی کا بحران شدت اختیار کر گیا ہے۔ شہر کے مختلف علاقوں اور محلوں میں نصب متعدد ٹرانسفارمر اضافی لوڈ برداشت نہ کر سکے، جس کے باعث کئی علاقوں میں گھنٹوں بجلی کی فراہمی معطل رہی مسلسل بجلی بندش نے شہریوں کی مشکلات میں اضافہ کر دیا ہے اورمعمولاتِ زندگی بری طرح متاثر ہو گئے ہیں۔متاثرہ علاقوں کے رہائشیوں نے الزام عائد کیا ہے کہ خراب ٹرانسفارمرز کی فوری تبدیلی اور متبادل ٹرانسفارمرز کی فراہمی بجلی تقسیم کار ادارے کی ذمہ داری ہے، تاہم متعلقہ عملے کی جانب سے بروقت اقدامات نہ کیے جانے کے باعث عوام کو شدید مشکلات کا سامنا ہےبجلی کی طویل بندش کے باعث شدید گرمی میں بچے،بزرگ، خواتین اور مریض سخت اذیت میں مبتلا ہیں، جبکہ پانی کی فراہمی بھی متاثر ہونے سے کئی علاقوں میں شہری پینے کے پانی تک کے لیے پریشان دکھائی دیتے ہیں۔شہریوں نے وزیر اعظم شہباز شریف، وزیر اعلی پنجاب مریم نواز سمیت اعلیٰ حکام سے ایس ڈی او واپڈا سٹی دینہ اور لائن سپرٹنڈنٹ کے خلاف کاروائی کرنے کا مطالبہ کیا ہے اور ساتھ ہی ساتھ خراب ٹرانسفارمرز کی فوری تبدیلی، متبادل ٹرانسفارمرز کی فراہمی اور بجلی کی بلا تعطل سپلائی یقینی بنانے کا مطالبہ کیا ہے۔ ان کا کہنا ہے کہ اگر صورتحال پر فوری توجہ نہ دی گئی تو عوامی مشکلات میں مزید اضافہ ہوگا۔ ایسا نا ہو کہ گرمی کی ستائی عوام سڑکوں یا واپڈا کا رخ کر لے جس کی تمام تر ذمہ داری انتظامیہ پر ہو گی دوسری جانب اس معاملے پر متعلقہ بجلی تقسیم کار ادارے کا مؤقف حاصل کرنے کی کوشش کی گئی، تاہم خبر کی اشاعت تک کوئی باضابطہ ردِعمل موصول نہیں ہو سکا۔
