پنڈدادنخان ( راشد خان سے)کھیوڑہ تا پنڈدادنخان زیر تعمیر پلوں پر پیشہ ور بھکاری گروہوں کے ڈیرے، معصوم بچوں کے مبینہ استعمال پر تشویش دوسرے صوبوں سے آئے خاندان سیم نالہ اور جلالپور کینال پلوں پر سست رفتار ٹریفک سے فائدہ اٹھا کر بھیک مانگنے میں مصروف میڈیا نے ڈی ایس پی میاں عبدالجبار کو صورتحال سے آگاہ کر دیاتفصیلات کے مطابقکھیوڑہ تا پنڈدادنخان زیر تعمیر سیم نالہ اور جلالپور کینال نہر کے پلوں کے اطراف پیشہ ور بھکاری خاندانوں کی بڑھتی ہوئی موجودگی نے شہریوں، مسافروں اور مقامی حلقوں میں تشویش کی لہر دوڑا دی ہے۔ زیر تعمیر پلوں کے اطراف سڑکیں تاحال کچی ہونے کے باعث گاڑیاں رفتار کم کرنے پر مجبور ہوتی ہیں، جس سے فائدہ اٹھاتے ہوئے دوسرے صوبوں سے آئے مبینہ پیشہ ور بھکاری خاندان صبح سے شام تک گاڑیوں سے بھیک مانگتے ہیں اور انہی مقامات کو اپنا مستقل ٹھکانہ بنائے ہوئے ہیں۔مبینہ ذرائع کے مطابق ان گروہوں کے ساتھ بڑی تعداد میں معصوم بچے، بچیاں، خواتین اور لاغر یا معذور دکھائی دینے والے افراد بھی موجود ہوتے ہیں۔ ذرائع کا دعویٰ ہے کہ زیادہ ہمدردی اور بھیک حاصل کرنے کے لیے بچوں کو بھی بھیک مانگنے پر لگایا جاتا ہے، جبکہ بعض بچوں کو مبینہ طور پر نشہ آور یا نیند آور ادویات دے کر سلایا جاتا ہے۔اطلاعات کے مطابق گزرنے والے دنوں کے ساتھ ان پیشہ ور بھکاری گروہوں کی تعداد میں مسلسل اضافہ ہو رہا ہے، جس میں بچوں، بچیوں اور نوجوان لڑکیوں کی تعداد بھی نمایاں ہے۔ مقامی حلقوں کا کہنا ہے کہ اگر بروقت کارروائی نہ کی گئی تو ایسے غیر مقامی گروہوں کی موجودگی مستقبل میں امن و امان کے لیے خطرہ بن سکتی ہے اور سنیچنگ، چوری، ڈکیتی سمیت دیگر جرائم کی روک تھام بھی مشکل ہو سکتی ہے۔اس تشویشناک صورتحال پر سالٹ رینج میڈیا کلب رجسٹرڈ پنڈدادنخان کے عہدیداران نے ڈی ایس پی میاں عبدالجبار سے ملاقات کر کے انہیں تفصیلی طور پر آگاہ کیا اور مطالبہ کیا کہ ان افراد کی شناخت، رہائش، نقل و حرکت اور سرگرمیوں کی مکمل جانچ پڑتال کرتے ہوئے قانون کے مطابق مؤثر کارروائی کی جائے تاکہ عوام کے جان و مال کا تحفظ یقینی بنایا جا سکے۔
