جہلم (نعیم احمد بھٹی) محکمہ سوشل ویلفیئر کا اقدام: تحصیل دینہ میں 70 معذور افراد کو امدادی آلات جلد تقسیم کئے جائیں گے۔ تفصیلات کے مطابق محکمہ سوشل ویلفیئر ضلع جہلم نے معذور افراد کی فلاح و بہبود کے لیے ایک اہم قدم اٹھاتے ہوئے تحصیل دینہ میں 70 معذور افراد کو امدادی آلات تقسیم کرنے کا اعلان کیا ہے۔یہ بات ڈپٹی ڈائریکٹر سوشل ویلفیئر جہلم، خضر خان نے ایڈیشنل ڈپٹی کمشنر جنرل شگفتہ جبیں کی زیر صدارت منعقدہ ایک اجلاس میں بتائی۔ انہوں نے بتایا کہ ان امدادی آلات میں ویل چیئرز، آلات سماعت اور سفید چھڑی شامل ہیں۔اجلاس میں ڈپٹی ڈائریکٹر خضر خان نے مزید بتایا کہ ضلع جہلم میں اب تک مجموعی طور پر 192 افراد کو مختلف اقسام کے امدادی آلات کامیابی سے تقسیم کیے جا چکے ہیں، جس سے معذور افراد کے معیار زندگی کو بہتر بنانے میں مدد ملی ہےاسی طرح ضلع جہلم میں 10 ہزار افراد کو ہمت کارڈ جاری کرنے کا ٹارگٹ مقرر کیا گیا ہے ۔ ایڈیشنل ڈپٹی کمشنر جنرل شگفتہ جبیں نے محکمہ سوشل ویلفیئر کی کارکردگی کو سراہتے ہوئے ہدایت کی کہ معذور افراد کے لیے امدادی آلات کی تقسیم کے عمل کو مزید موثر اور بہتر بنایا جائے۔ انہوں نے خصوصی طور پر ہدایت جاری کی کہ مستحق معذور افراد کو جلد از جلد ہمت کارڈ بھی فراہم کیے جائیں تاکہ وہ حکومت کی جانب سے فراہم کردہ دیگر سہولیات سے بھی فائدہ اٹھا سکیں۔
