جہلم (نعیم احمد بھٹی) ڈپٹی کمشنر جہلم میر رضا اوزگن نے راولپنڈی ویسٹ مینجمنٹ کمپنی (RWMC) جہلم کے عملے کی حوصلہ افزائی کے لیے ان میں سپورٹس شرٹس تقسیم کیں۔ اس اقدام کا مقصد فیلڈ اسٹاف کو کھیلوں کی سرگرمیوں کی طرف راغب کرنا ہے تاکہ وہ اپنی روزمرہ کی سخت مصروفیات میں سے کچھ وقت کھیل کے لیے نکالیں اور صحت مند زندگی گزار سکیں۔ اس موقع پر ڈپٹی کمشنر نے اعلان کیا کہ ملازمین کے درمیان جلد ایک کرکٹ میچ بھی کروایا جائے گا۔ انہوں نے گفتگو کرتے ہوئے کہا کہ شہر کی صفائی ستھرائی کے لیے دن رات کام کرنے والے اہلکار ہمارا قیمتی اثاثہ ہیں اور ان کی جسمانی و ذہنی تندرستی کے لیے ایسی سرگرمیاں انتہائی ضروری ہیں۔ سپورٹس شرٹس کی تقسیم اسی سلسلے کی ایک کڑی ہے تاکہ ملازمین کے مورال کو بلند کیا جا سکے۔ڈپٹی کمشنر نے مزید کہا کہ انتظامیہ ملازمین کو صحت مند ورکنگ ماحول فراہم کرنے کے لیے تمام ممکنہ اقدامات کر رہی ہے۔ انہوں نے اس عزم کا اظہار کیا کہ کھیلوں کے انعقاد سے جہاں ملازمین کی صحت بہتر ہوگی وہاں ان میں ٹیم ورک کا جذبہ بھی پیدا ہوگا، جو عوامی خدمات کی فراہمی میں مزید بہتری کا باعث بنے گا۔
