جہلم:کسی بھی صورت عوام کی صحت سے کھیلنے والوں کو برداشت نہیں کیا جائے گا۔ڈپٹی ڈائریکٹر پنجاب فوڈ اتھارٹی جہلم فرحان وسیم،روزانہ کی بنیاد پر دودھ، گوشت، مصالحہ جات اور گھی و آئل کی باقاعدہ چیکنگ کی جاتی ہے،میڈیا سے گفتگو

جہلم:کسی بھی صورت عوام کی صحت سے کھیلنے والوں کو برداشت نہیں کیا جائے گا۔ڈپٹی ڈائریکٹر پنجاب فوڈ اتھارٹی جہلم فرحان وسیم
جہلم(پروفیسر خورشید علی ڈار)تفصیلات کے مطابق ڈپٹی ڈائریکٹر پنجاب فوڈ اتھارٹی جہلم فرحان وسیم نے میڈیا سے گفتگو کرتے ہوئے کہا ہے کہ عوام کو محفوظ اور معیاری خوراک کی فراہمی پنجاب فوڈ اتھارٹی کی اولین ترجیح ہے، اسی مقصد کے تحت ضلع بھر میں بلا تفریق کارروائیاں جاری ہیں۔ انہوں نے بتایا کہ روزانہ کی بنیاد پر دودھ، گوشت، مصالحہ جات اور گھی و آئل کی باقاعدہ چیکنگ کی جاتی ہے تاکہ ملاوٹ اور غیر معیاری اشیاء کی روک تھام یقینی بنائی جا سکے۔فرحان وسیم کا کہنا تھا کہ قوانین کی خلاف ورزی کرنے والوں کے خلاف سخت کارروائی عمل میں لائی جاتی ہے، جس میں جرمانے عائد کرنے کے ساتھ ساتھ ایف آئی آرز کا اندراج بھی شامل ہے۔ انہوں نے واضح کیا کہ پنجاب فوڈ اتھارٹی 2018 سے سماج دشمن عناصر کے خلاف مسلسل اور مؤثر اقدامات کر رہی ہے اور کسی بھی صورت عوام کی صحت سے کھیلنے والوں کو برداشت نہیں کیا جائے گا۔ڈپٹی ڈائریکٹر نے شہریوں سے اپیل کی کہ وہ غیر معیاری یا ملاوٹ شدہ خوراک کی نشاندہی کے لیے پنجاب فوڈ اتھارٹی سے تعاون کریں تاکہ صحت مند معاشرے کے قیام کو یقینی بنایا جا سکے۔