جہلم:تھانہ صدر کی حدود میں نامعلوم افراد کی فائرنگ سے 25/26 سالہ بینک ملازم نعمان مصطفی جاں بحق ہو گیا۔ واقعے کے بعد علاقے میں خوف و ہراس پھیل گیا جبکہ اہل علاقہ کی بڑی تعداد جائے وقوعہ پر جمع ہو گئی
جہلم(نعیم احمد بھٹی)تھانہ صدر کی حدود میں نامعلوم افراد کی فائرنگ، نوجوان بینک ملازم جاں بحق تفصیلات کے مطابق تھانہ صدر کی حدود میں نامعلوم افراد کی فائرنگ سے 25/26 سالہ بینک ملازم نعمان مصطفی جاں بحق ہو گیا۔ مقتول کی شناخت نعمان مصطفی ولد غلام مصطفی، قوم جٹ، سکنہ کوٹھا سواریہ، ڈاک خانہ میرا، ضلع جہلم کے نام سے ہوئی ہے۔ پولیس کے مطابق نعمان مصطفی موٹر سائیکل نمبر 8229/BBc پر سوار تھا کہ اچانک نامعلوم ملزم نے اس پر فائرنگ کر دی، جس کے نتیجے میں وہ شدید زخمی ہو گیا اور زخموں کی تاب نہ لاتے ہوئے موقع پر ہی دم توڑ گیا۔ واقعے کے بعد علاقے میں خوف و ہراس پھیل گیا جبکہ اہل علاقہ کی بڑی تعداد جائے وقوعہ پر جمع ہو گئی۔ اطلاع ملتے ہی پولیس کی بھاری نفری موقع پر پہنچی، علاقے کو گھیرے میں لے کر شواہد اکٹھے کیے اور لاش کو قانونی کارروائی کے لیے ڈسٹرکٹ ہیڈکوارٹر ہسپتال منتقل کر دیا گیا، جہاں پوسٹ مارٹم کے بعد نعش ورثا کے حوالے کی جائے گی پولیس حکام کے مطابق ملزمان واردات کے بعد فرار ہونے میں کامیاب ہو گئے۔ واقعے کے محرکات جاننے کے لیے تحقیقات جاری ہیں۔ قریبی علاقوں کی سی سی ٹی وی فوٹیج حاصل کی جا رہی ہے جبکہ مقتول کے موبائل فون ریکارڈ، ذاتی روابط اور اہل خانہ کے بیانات بھی قلم بند کیے جا رہے ہیں پولیس کا کہنا ہے کہ تاحال کسی ملزم کی گرفتاری عمل میں نہیں آ سکی تاہم ملزمان کی تلاش کے لیے خصوصی ٹیمیں تشکیل دے دی گئی ہیں اور جلد ملزمان کو گرفتار کرنے کی امید ہے۔
