جہلم (نعیم احمد بھٹی) ڈپٹی کمشنر جہلم/ کنٹرولر سول ڈیفنس میر رضا اوزگن کی خصوصی ہدایت پر سول ڈیفنس آفیسر جہلم محمد بوٹا نے ٹھٹی گجراں کے قریب واقع "پومی بیگ اینڈ برادر ایل پی جی گیس ایجنسی” پر اچانک چھاپہ مارا اور قواعد کی سنگین خلاف ورزی پر بڑی کارروائی کی۔دورانِ انسپکشن معلوم ہوا کہ مذکورہ گیس ایجنسی کا پرمٹ لائسنس عرصہ دراز سے ایکسپائر ہو چکا تھا، لیکن اس کے باوجود مالکان غیر قانونی طور پر گیس سلنڈرز کی فروخت کا کام جاری رکھے ہوئے تھے، جو کہ عوامی تحفظ کے حوالے سے قانون کی صریحاً خلاف ورزی ہے۔ڈپٹی کمشنر کی ہدایت پر سول ڈیفنس ٹیم نے فوری ایکشن لیتے ہوئے ایکسپائر لائسنس پر کام کرنے کی پاداش میں مذکورہ ایل پی جی گیس ایجنسی کو موقع پر سیل (Seal) کر دیا اور مالکان کو بھاری جرمانہ بھی عائد کیا گیا تاکہ مستقبل میں ایسی خلاف ورزیوں کا سداد ہو سکے۔۔ڈپٹی کمشنر جہلم میر رضا اوزگن نے اس موقع پر واضح کیا کہ انسانی جانوں کو خطرے میں ڈال کر غیر قانونی کاروبار کرنے والے کسی رعایت کے مستحق نہیں۔ انہوں نے ضلعی انتظامیہ کو ہدایت کی کہ ضلع بھر میں بغیر پرمٹ کام کرنے والی گیس ایجنسیوں کے خلاف بلا امتیاز کریک ڈاؤن جاری رکھا جائے تاکہ شہریوں کا تحفظ یقینی بنایا جا سکے۔
