گورنمنٹ گریجویٹ کالج آف کامرس، جہلم میں پیرنٹ ٹیچر میٹنگ کا انعقاد
جہلم (مشرف جنجوعہ)گورنمنٹ گریجویٹ کالج آف کامرس، بلال ٹاؤن، جہلم میں آج پیرنٹ ٹیچر میٹنگ (PTM) کامیابی کے ساتھ منعقد ہوئی۔ میٹنگ میں والدین، اساتذہ کرام اور کالج انتظامیہ کی بڑی تعداد نے شرکت کی جس سے طلبہ کی تعلیمی بہتری کے لیے مشترکہ کوششوں کا عملی مظاہرہ دیکھنے میں آیا۔ اجلاس کے دوران والدین کو طلبہ کی تعلیمی کارکردگی، حاضری، نظم و ضبط اور امتحانی نتائج سے آگاہ کیا گیا۔ اساتذہ نے انفرادی طور پر طلبہ کی پیش رفت پر تبادلۂ خیال کیا اور تعلیمی معیار کو مزید بہتر بنانے کے لیے مفید تجاویز دیں۔ والدین نے بھی اساتذہ اور انتظامیہ کی کاوشوں کو سراہا۔ کالج انتظامیہ نے تعلیمی عمل میں والدین کے کردار کی اہمیت پر زور دیا اور اس بات کو اجاگر کیا کہ والدین اور اساتذہ کے باہمی تعاون سے ہی طلبہ کو بہتر مستقبل فراہم کیا جا سکتا ہے۔ میٹنگ کے دوران نظم و نسق کے بہترین انتظامات کیے گئے جس کے باعث ماحول خوشگوار اور تعمیری رہا۔ پرنسپل کالج نے والدین کی بھرپور شرکت پر اطمینان کا اظہار کیا اور کنٹرول امتحانات، ڈپٹی کنٹرولرز، کلاس انچارجز اور معاون عملے کی خدمات کو سراہتے ہوئے پیرنٹ ٹیچر میٹنگ کے کامیاب انعقاد پر ان کا شکریہ ادا کیا۔
