*ڈسٹرکٹ جیل جہلم میں بھی لٹریسی پروگرام کا افتتاح، قیدیوں میں کِٹس تقسیم ،جہلم جیل میں 100 قیدیوں کا اندراج مکمل*
جہلم(ظہیر عبّاس)تفصیلات کے مطابق وزیراعلیٰ پنجاب مریم نواز کے ویژن کے تحت صوبہ بھر کی جیلوں میں قیدیوں کی بحالی اور اصلاح کے لیے تعلیمِ بالغاں مراکز کے قیام کا تاریخی منصوبہ شروع کر دیا گیا ہے۔جس سے 32 ہزار قیدی مستفید ہوں گے۔ اس سلسلے میں گزشتہ روز ڈسٹرکٹ جیل لاہور میں ایک پروقار اور شاندار افتتاحی تقریب منعقد ہوئی، جس میں ہوم سیکرٹری، چیئرمین ٹاسک فورس، آئی جی جیل خانہ جات، ڈی آئی جی، اسپیشل سیکرٹری اور ڈی جی لٹریسی عاصم جاوید سمیت اعلیٰ حکام نے شرکت کی۔اسی تسلسل میں ڈسٹرکٹ سینٹرل جیل جہلم میں بھی چیف منسٹر پنجاب لٹریسی پروگرام کا باقاعدہ افتتاح کیا گیا۔ یہ تقریب ڈائریکٹر جنرل لٹریسی عاصم جاوید کی قیادت میں ڈسٹرکٹ ایجوکیشن آفیسر لٹریسی میمونہ انجم اور سپرنٹنڈنٹ سینٹرل جیل جہلم یاسر خان کی زیرِ نگرانی منعقد ہوئی۔اس موقع پر قیدیوں میں تعلیمی کِٹس تقسیم کی گئیں تاکہ وہ اپنی بنیادی خواندگی اور زندگی کی ضروری مہارتیں سیکھنے کا سفر شروع کر سکیں۔پروگرام کی تفصیلات بتاتے ہوئے ڈی ای او لٹریسی میمونہ انجم نے بتایا کہ جہلم جیل میں چار بالغ خواندگی مراکز قائم کیے گئے ہیں جہاں پہلے مرحلے میں 100 قیدیوں کا اندراج مکمل کر لیا گیا ہے۔ حکام کا کہنا ہے کہ یہ اقدام قیدیوں کی ذہنی آبیاری اور انہیں معاشرے کے دھارے میں دوبارہ شامل کرنے کے حوالے سے سنگِ میل ثابت ہو گا۔
