جہلم (مشرف جنجوعہ) امیر جماعت اسلامی پاکستان حافظ نعیم الرحمان کی اپیل پر ملک بھر کی طرح جہلم میں بھی پٹرول و ڈیزل اور سوئی گیس کی ظالمانہ اور بے تحاشہ بڑھتی ہوئی قیمتوں کے خلاف احتجاجی ریلی کا اھتمام کیا گیا ، ریلی دفتر جماعت اسلامی مشین محلہ نمبر 1 سے شروع ہو کر شاندار چوک پہنچی ، جہاں مقررین نے خطاب کرتے ہوئے حکومت سے مطالبہ کیا کہ فی الفور پٹرول و ڈیزل کی قیمتوں میں کمی کی جائے ، عوام پہلے ہی مہنگائی کی چکی میں پس رہی ہے اوپر سے پٹرول بم نے رہی سہی کسر بھی نکال دی ہے ، مقررین کا کہنا تھا کہ آئی ایم ایف کو صرف غریب عوام کی جیبوں پر ڈاکہ ڈالنے پر اعتراض ہوتا ہے جبکہ حکمرانوں کے اللے تللے انہیں نظر نہیں آتے ، گیارہ ارب کا جہاز خریدا گیا ، چیئرمین سینیٹ کے لیے نو کروڑ کی گاڑی خریدی گئی اس پر اعتراض کیوں نہ کیا گیا ، حکومت حالیہ بڑھائے گئے نرخ واپس لے اور پٹرول کی قیمتوں میں 150 روپے لیٹر کمی کی جائے ، حاضرین سے خطاب کرنے والوں میں امیر جماعت اسلامی ضلع جہلم ڈاکٹر قاسم محمود چوہدری ، نائب امیر ضلع راجہ ندیم احمد ، نائب امیر ضلع و صدر سیاسی کمیٹی سید ضیاء اللّٰہ بخاری نے خطاب کیا ، اس موقع پر حاضرین کی بڑی تعداد موجود تھی جنہوں نے فلک شگاف نعروں سے ماحول کو اس گرم موسم میں مزید گرمائے رکھا ،
