جہلم(رانا محمد عاصم )شہری دفاع کی تربیت امن اور جنگ دونوں حالات میں انتہائی ضروری ہے، نوجوانوں کو سول ڈیفنس کی ٹریننگ دے کر معاشرے کا ایک مفید شہری بنایا جا سکتا ہے جو آنے والے وقت میں ملک کو قوم کے لیے اثاثہ ثابت ہوتے ہیں یہ بات ڈپٹی کمشنر جہلم میثم عباس نے گورنمنٹ الطاف حسین ہائی سکول میں عالمی یوم سول ڈیفنس کے حوالے سے منعقدہ تقریب سے خطاب کرتے ہوئے کہی۔ اس موقع پر سول ڈیفنس جہلم کی جانب سے سکول کے طلبہ کو سول ڈیفنس کی ٹریننگ فراہم کرنے کے بعد عملی مظاہرہ کیا گیا جس میں طلبہ نے آگ بجھانے بلڈنگ سے اترنے ایمرجنسی صورتحال میں مریضوں کو ریسکیو کرنے، دہشت گردی کی صورت میں اپنے تحفظ کو یقینی بنانے سمیت دیگر امور پر اپنی تربیت کا مظاہرہ پیش کیا۔ ڈپٹی کمشنر نے طلبہ کو دی جانے والی سول ڈیفنس ٹریننگ پر اطمینان کا اظہار کرتے ہوئے سول ڈیفنس کے عملے کو شاباش دی اس موقع پر ٹریننگ مکمل کرنے والے بچوں میں سرٹیفیکیٹ جبکہ سول ڈیفنس کے عملہ میں شیلڈز تقسیم کی گئی۔
